யாழில். நண்பர்களுடன் கடலில் குளிக்க சென்ற இளைஞன் சடலமாக மீட்பு

யாழ்ப்பாணத்தில் நேற்றைய தினம் வெள்ளிக்கிழமை நண்பர்களுடன் கடலில் குளிக்க சென்ற இளைஞன் கடலில் மூழ்கி உயிரிழந்துள்ளார்.

இணுவில் பகுதியை சேர்ந்த பி.சாருஜன் (வயது 20) எனும் இளைஞனே , உயிரிழந்துள்ளார். 

இணுவில் பகுதியை சேர்ந்த 14 பேர் கொண்ட இளைஞர்கள் குழுவொன்று மாதகல் கடலில் குளிக்க சென்றுள்ளனர்.  இளைஞர்கள் கடலில் குளித்துக்கொண்டிருந்த வேளை பாரிய அலை ஒன்று எழுந்ததால் , இளைஞன் ஒருவர் கடலில் அடித்து செல்லப்பட்டார். 

கடலில் அடித்து செல்லப்பட்ட இளைஞனை , கூட சென்ற இளைஞர்கள் , அப்பகுதி கடற்தொழிலாளர்கள் உள்ளிட்டவர்கள் தேடிய போதிலும் , இளைஞனை மீட்க முடியவில்லை. 

இந்நிலையில் மாலை குறித்த இளைஞனின் சடலம் கரையொதுங்கியுள்ளது.

சடலம் உடற்கூற்று பரிசோதனைக்காக யாழ்.போதனா வைத்தியசாலையில் ஒப்படைக்கப்பட்டுள்ள நிலையில் , இளவாலை பொலிஸார் விசாரணைகளை முன்னெடுத்துள்ளனர்.