விதைகளும் தியாகங்களும் என்றைக்கும் வீணாவதில்லை - யாழில். வைரமுத்து

விதைகளும் தியாகங்களும் என்றைக்கும் வீணாவதில்லை;

ஒருநாள் முளைத்தே தீரும் என கவிப்பேரசு வைரமுத்து யாழ்ப்பாணத்தில் கவிதை வடித்துள்ளார். 

யாழ்ப்பாணத்தில் நேற்றைய தினம் ஞாயிற்றுக்கிழமை நடைபெற்ற , மில்லர் திரைப்பட ஆரம்ப நிகழ்வில் கலந்து கொண்டமை தொடர்பில் தனது முகநூலில் கவிதை ஒன்றினை பதிவு செய்துள்ளார். அதிலையே அவ்வாறு குறிப்பிட்டுள்ளார். 

குறித்த கவிதையாவது, 

"யாழ்ப்பாணத்தில் நிற்கிறேன்;

புலம்பெயர்ந்த

உலகத் தமிழர்களோடு

உரையாட விழைகிறேன்

நீங்கள் விளையாடிய

வீதிகள் நலம்;

குடைபிடிக்கும்

வேப்ப மரங்கள் நலம்

சாவகச் சேரி சௌக்கியம்;

நீங்கள் சௌக்கியமா?

பருத்தித்துறை சௌக்கியம்;

உங்கள் பாச உறவுகள்

சௌக்கியமா?

முகமாலை நலம்;

உங்கள் முன்னோடிகள் நலமா?

புத்தூர் சௌக்கியம்;

உங்கள் பிள்ளைகள் சௌக்கியமா?

உங்கள்

தலைமுறை வரைக்கும்

தமிழ் ஈழத்தின்மீது

உங்களுக்கு தாகம் இருக்கும்

உங்கள் பிள்ளைகளுக்கும்

அதேதாகம் வேண்டுமாயின்

அவர்களையும்

தமிழ்படிக்கச் செய்யுங்கள்

மண்ணும் மொழியும்

கண்ணும் உயிரும்

என்று கற்றுக்கொடுங்கள்

விதைகளும் தியாகங்களும்

என்றைக்கும் வீணாவதில்லை;

ஒருநாள் முளைத்தே தீரும்"

என்று பேசினேன்

கண்ணீர் ததும்பக்

கரவொலி செய்தார்கள் என முகநூலில் பதிவு செய்துள்ளார்.