முல்லைத்தீவில் வயல் காவலில் ஈடுபட்டிருந்த இளைஞன் காட்டு யானை தாக்கி உயிரிழப்பு

முல்லைத்தீவு , தேறாங்கண்டல் பகுதியில் இன்றைய தினம் சனிக்கிழமை அதிகாலை காட்டு யானை தாக்கியதில் 19 வயது இளைஞன் உயிரிழந்துள்ளார். 

தேறாங்கண்டல் பகுதியில் உள்ள வயல் காவலுக்காக அமைக்கப்பட்டிருந்த கொட்டிலில் இன்று அதிகாலை மூவர் தங்கியிருந்தபோது, அங்கு வந்த காட்டு யானை திடீரெனக் கொட்டிலைச் சேதப்படுத்தி அவர்கள் மீது தாக்குதல் நடத்தியுள்ளது. 

இதன்போது இருவர் தப்பியோடிய நிலையில், தேறாங்கண்டல் பகுதியைச் சேர்ந்த பொன்முடி சுஜீவன் என்ற 19 வயது இளைஞன் யானையின் தாக்குதலுக்கு இலக்காகிச் சம்பவ இடத்திலேயே உயிரிழந்துள்ளார். 

முல்லைத்தீவு மாவட்டத்தில் அண்மைக்காலமாக காட்டு யானைகளின் அச்சுறுத்தல் அதிகரித்து வருவதால், விவசாயிகள் தமது வாழ்வாதாரச் செயற்பாடுகளை முன்னெடுப்பதில் பெரும் அச்சமடைந்துள்ளமை குறிப்பிடத்தக்கது.